Авторын произведенийже-влак почеш Марий театрын сценыштыже икмыняр драмыже шындалтын: «Кӱдырчан ӱжара», «Корныеҥ», «Аксар ден Юлавий», «Шарнет, Элиса?», «Шӱм парым», «Пӱрыдымӧ пӱрымаш».
А «Илыш корнышто» пьесыжлан «Марий АССР-ын заслуженный артистше» чаплӱмым пуэныт. Шарнымаш касышке «Театрланак шочын улмаш» толшо уна-влак Константин Коршуновын йöсö илышыж нерген пален налыныт, театр пашашке толмо корныж нерген вӱдышö-влак келгын каласкален пуэныт. Тиде кечын тудым пагален толын улыт: А. И. Мокеев, Россий писатель ушемын членже, Л. И. Козылбаева, туныктышо-пенсионер, Р. А. Патрушева да Р. Г. Ермакова, Лоскутово ялыште илыше-влак, Р. С. Шабердина, Кугу Мушко ялын книгагудо пашаеҥже. Константин Максимович нерген шке шарнымашыштым уна-влак почын пуэныт, а Раисия Степановна Шабердина К. Коршуновын Лениградыште артистлан тунемме жапше да модмо рольым келгын почын пуымо нерген палемдыш. Аркадий Васильевич Макматов сылне гармонь муро сем дене касым сöрастарыш, молан манаш гын, Константин Коршуноват гармонь дене сылнын шоктен моштен. Кеҥеж кастене ныжыл гармонь йӱкшӧ дене Кӱчыкэҥер ял калыклан неле илышым, ойгым, жаплан мондыктараш тыршен. Шарнымаш касыште драматургын произведений-влакше дене палыме лийыныт да тудын талантшым чын аклаш тыршеныт. Илышым сайын палыше, чыла неле-йӧсым сеҥен лекше, сценын законжым келгын шинчыше да шочмо йылмым, культурым чон пытен йӧратыше еҥ гына калыкын пагалыме артистшат, уста драматургшат лийын кертеш.
Яшкина Е. Л., рӱдö книгагудын краеведений сектор вуйлатыше
Автор публикации
